Yangiliklar

O‘zbekistonda 82 turdagi materiallarni mamlakatga bojxona bojiisiz olib kirish mumkin

O‘zbekistonda mahalliy ishlab chiqaruvchilar uchun muhim bojxona imtiyozlari joriy etildi. Prezidentning 19-yanvardagi farmoniga muvofiq, O‘zbekiston sanoat xomashyosi va yarim tayyor mahsulotlarning 82 turiga import bojlarini rasman nolga tushirdi. Yangi imtiyozli tartib ikki yil davomida — 2027-yil 1-yanvargacha amal qiladi.

Ta’kidlash joizki, bu amaliyot mamlakat uchun yangilik emas. Mazkur xomashyolar bo‘yicha bojxona imtiyozlari ilk bor 2021-yil oktabr oyida joriy etilgan bo‘lib, ularning amal qilish muddati 2024-yil 1-yanvarda yakunlangan. Ikki yillik tanaffusdan so‘ng davlat real iqtisodiyot sektorini qo‘llab-quvvatlashni qayta tiklash va mahsulot tannarxini pasaytirish maqsadida ushbu imtiyozlarni uzaytirishga qaror qildi.

Ro‘yxat sanoatning turli tarmoqlari uchun strategik ahamiyatga ega materiallarni o‘z ichiga oladi. Unda asosan to‘qimachilik va kimyo sanoati uchun zarur komponentlar katta ulushni egallaydi.

Bojxona bojidan ozod etilgan asosiy mahsulotlar:

• Kimyoviy mahsulotlar: kaustik soda, kaliy gidroksidi, kastor yog‘i, turli karbidlar va peroksidlar.

• Bo‘yoqlar va reagentlar: organik va to‘qimachilik bo‘yoqlari, titan dioksidi asosidagi pigmentlar, polipigment pastalar va keramika uchun shisha emallar.

• Polimerlar va plastmassalar: polipropilen, vinilxlorid polimerlari, asetat plyonkalar va neylon lentalar.

• To‘qimachilik xomashyosi: jun va paxta matolari, zig‘ir matolari, sun’iy mo‘yna, sintetik iplar, tuk va to‘r mahsulotlari.

• Texnik materiallar: asbest, filtr qog‘ozi, fanera, shisha tolali buyumlar, shuningdek, zajigalka qismlari va birlamchi batareyalar.